SERAT THOLELOLA

SERAT
THOLELOLA


1. Lelakoning ngong ngalola, maligi lugu lelagoning gendhing, gandhang kumandhang wus kadhung, ginandheng tinandhangan, murih dhangan den dinandanan samun, semunipun asru tapa, tepa tepining ngastuti.
2. Dhelag dheleg mung pribadya, tebih kanca tebih wisma ngideri, lara lapa trus lelaku, lukitane luhira, sapana mimpangi karuwetaningsun, enggala gelaran lukar, rubeda gumanti aji.
3. Ngaji aji jati rasa, jinurung dalah kahananireki, teki-teki tresnaningsun, ginawa upakara, karana ta sabda nata titi durung, kadereng kadhare babar, binabar den titi aglis.
4. Gelise lan tatanira, pulih kadya rikala kuna nguni, kekalane huningani maknani, angumpul kekumpulan, pakolehe pepadhanging bebrayan gung, ambrekati karahmatan, raharjane angiringi.
5. Hangirangi kawirangan, wuryanira aywa blawur saluwir, luwaripun turut lurung, durung kelar kesasar, sasat sarira anut temahan susut, sumedhot sinawang wang wang,mangkene rehane dhiri.
6. Dhedasare kendhang raga, kadya lumebweng pangimpen wengi,dhasar wingi datan wungu, wengane sarwa padha, samya suka duhita dalah gegetun, ginegetan beda rasa, siji nyata maya impi.
7. Wekasipun katempuhan, byar ambyaring paripurna pangimpi, thele thele mbuwang kemul, kamulane pinetan, anjok jroning pasupenan sekar agung, kamitenggeng kamigilan, pindha driji munggweng lathi.
8. Setyaningwang tan sulaya, ya ta tunggal datan bisa gumanti, awit gumatining kayun, kahyunghyun tulus tapa, pisungsun dalah talatene tumpuk undhung, kamil tanpa tandhing nyata, aywa was ganthiling ngati.
9. Prasapane kenging tawang, tangisira angebeki pratiwi, badan wus nyawiji dangu, sirengsun tetepana,